فيه فرق بين الرأي والتعصب. الرأي إن ميدو يشوف إن أبو تريكة لعيب كبير لكن يشوف إن حازم إمام أفضل منه. لكن التعصب إنك تشوف إن أبو تريكة فاشل لأسباب ملهاش علاقة بالكرة.

الرأي إن أحمد الطيب يرد ويقول إن أبو تريكة لا يقارن إلا بحسام حسن وإن حازم أقل. لكن التعصب إنك تشوف حازم لاعب فاشل لمجرد إنك بتحب أبوتريكة.

أخبار متعلقة:

مانشستر يونايتد ينجو من فخ ديربي "غالي" مصطفى كريم يؤكد اهتمام الأهلي .. والقيعي ينفي الاتحاد ينفي محاولة الأهلي التعاقد مع حارس مرماه زكي يقود الزمالك لنهائي كأس مصر

أسبوع كامل عشناه على مقارنة بين أتنين من أعظم اللاعبين في تاريخ الكرة المصرية.

من حقي أشوف حازم أفضل ومن حقك تشوف أبوتريكة أفضل. لكن مش من حقي ولا من حقك إنك تقلل من قيمة حد فيهم وتصفه بالفاشل وتبدأ تسرد وقائع أنت عارف إنها مش حقيقية لمجرد إن حد (يشيرها) ويكتب فوقيها تم قصف الجبهة.

قبل ما نتكلم في أي حاجة خلينا نتفق إن المقارنة بين أي 2 لعيبه في كرة القدم ملهاش علاقة من قريب أو من بعيد بعدد بطولاتهم لأننا ببساطة مش بنلعب تنس.

المقارنة هنا أصلها مدى تأثير كل لاعب فيهم في فريقه ومنتخب بلاده في الفترة اللي عاشها مع كرة القدم. تعالى بقى أما أحكيلك.

الواقع اللي مش عايز تشوفه لأنك أهلاوي بيقول إن حازم لعب بطولة رائعة في 98 في كأس الأمم مع المنتخب المصري.

صنع الكثير وفي ركلات الجزاء قدام كوت دي فوار في دور التمانية كان هو رجل الركلة الأخيرة وسجل.

حازم لعب كمان بطولة جيدة جدا في 2002 كسر فيها عقدة تونس وسجل وصنع فيها قدام زامبيا.

على الناحية الأخرى أبوتريكة لعب بطولة جيدة جداً في 2006 وكان رجل الركلة الأخيرة أمام كوت ديفوار في نهائي البطولة الماجيكو قدم بطولة رائعة في 2008 وسجل هدف الفوز بالكأس.

الواقع اللي أنت مش حابب تشوفه لأنك زملكاوي بيقول إن أبوتريكة في المباريات الكبيرة في إفريقيا مع الأهلي زي قدام النجم الساحلي وأورلاندو بايرتس كان ظاهر وبشدة.

نفس الحال لحازم قدام الوداد والترجي. حتى في الدوري المصري. الاثنين سجلوا في مباريات القمة، سجلوا ضد الإسماعيلي. هااا .. مش مقتنع .. طب خد اللي جايه.

يمكن يكون سنك صغير وملحقتش حازم الخارق للعادة في كأس القارات 99 اللي عمل شو قدام المكسيك اللي كسبت البرازيل في نهائي البطولة.

وقبلها شو تاني قدام بوليفيا قبل الانهيار أمام السعودية ويمكن لأنك شفت ده كله فمش عايز تشوف اللي الماجيكو عمله في كأس القارات في 2009 قدام البرازيل وإيطاليا قبل الانهيار قدام أمريكا.

لسه مش مقتنع. يمكن تكون شفت حازم وهو بيفوز بجائزة أفضل لاعب مهاري في العالم وقلت عليها دي بطولة إعلانية وعملت زي الزملكاوي اللي قال إن وجود أبوتريكة مع منتخب نجوم العالم برضه حدث عادي.

من حقي إني أشوف حازم أعلى مهاريا ومن حقك تشوف أبو تريكة أكثر تهديفا لكن في النهاية متحاولش تلغي حد عشان الثاني.

متحاولش تحجر على رأي ناس متقللش من قيمة حد فيهم لمجرد إنك بتشجع الأهلي أو الزمالك.

في النهاية عندك حل من الاثنين. يا (تشير) الفيديو ده يا تخليك عايش في عالم قصف الجبهة اللي أوعدك إنه هيتحول من هزار بينك وبين صحابك لخناقات ممكن تخسرك وتخسره.

يسقط يسقط قصف الجبهة.