10 أشياء لن تجدها إلا في "كابتن ماجد"
الأحد، 07 مايو 2017 - 13:36
نظرة تحليلية واستوديو مصغر لتحليل أشهر كارتون كروي على الإطلاق.. الكابتن ماجد
كلنا نعرف ان أي ملعب بيبقى أرض صلبة مستوية.. في كابتن ماجد لأ
الأرض عبارة عن بطيخة كبيرة أوي بيجروا عليها
وبتختلف أشكالها على حسب الهجمة
الكورة بتتحول من قوة التسديدة الى بيضه او الى شكل بيضاوي وممكن تبقى سادة أو بنار او بنسر.. الخ على حسب نوع التسديدة نفسها
وفي كل الأهداف تقريبا الكورة بتلف في الشبكة 60 لفة قبل ما تنزل على الأرض
الحكم في كابتن ماجد "مش متابع"
عنف وتكسير وإصابات بالجملة بتحصل في الماتش ومبيحسبش فاولات
زي بسام اللي بيجري من الجول للجول ويكسر في الفريقين من غير ما يتطرد، اللعيبة العمالقة اللي كانت بتدوس على ماجد وزمايله، تقريبًا الكارتون كله كان في إنذارين بس.
الإصابات في مسلسل كابتن ماجد أكتر من إصابات مانشستر يونايتد دلوقتي :D
مازن عنده مشكلة في القلب - وليد عنده إصابة في الكاحل - ماجد خلع في الكتف
المشكلة في الإصابت كابتن ماجد إنها بتبقى محتاجة عملية جراحية عاجلة والاعب مش بيتحامل على نفسه في ماتش بس لأ بيلعب بيها طول المسلسل!
أقوى شوطة شوفناها في حياتنا كانت في fifa 2002 world cup لما الكورة كانت بتلف وتطلع نار، أو شوطة روبرتو كارلوس في فرنسا.
في كابتن ماجد المنطقي إن الكورة تطلع نار بمجرد ما تشوطها، التسديدة ليها اسم الصقر ومخلب النمر وإعصار المحيط يعني مرعبة من الاسم بس.
فكرة إن الشوطة تتصد مش بس خيالية لأ انت لو وقفت في وش الكورة هتزعل وتجيب لعيبة تزعل وهتخش بيك الجون في الآخر.
متخيل بوفون مهما وصل لمستوى عالي فهو لسه أقل من رعد؟
حارس غريب جدا في فريق بسام (الحرية) .. لاعب كاراتيه سابق.. بيصد الكورة أيا كانت قوتها وسرعتها وإتجاهه .. بيقدر يغير من إتجاه جسمه في فيمتو ثانية وينط على القائم عشان يلحق الكورة قبل ما تدخل جول .. مش محتاج يصد بوشه ساعات بيدي ضهره للجون ويصد عادي .. ثقة نوير وخبرة بوفون وردات فعل دي خيا ومرونة جسم ميسي وقوة كريستيانو كلها في لاعب واحد.
كلنا حاولنا في يوم من الأيام نعمل الضربة المزدوجة وفشلنا :/
ماجد وياسين هما الوحيدين اللي قدروا يشوطوا الكورة مع بعض
ويخلوها تختفي وتظهر وتنقسم لكورتين لحد لما تدخل جول!
لو ده مش صعب كفاية فهما عملوها مرة خلفية مزدوجة عشان مش بس نفشل وإحنا بنحاول نقلدهم لأ نقع فوق بعض ونتصاب كمان -_-
لما ناس بتلعب مع بعض مدة كبيرة يحصل بينهم تفاهم كبير يقدر يخليهم عارفين تحركات بعض فيقدر واحد يباصي بدون ما يبص وزميله هيكون في المكان الصح، ده مفهوم طبعًا، في كابتن ماجد الموضوع أكبر شوية حيث إن الفريق كله فاهم كل واحد هيعمل ايه وحركات صعبة مش مجرد باصات او تحرك ده طيران في الجو وتسديدات ثنائية.
الأغرب كان لما ماجد يكلم نفسه ويقول سأهزمك يا بسام فبسام يكون بيتكلم في سره برضه وبيقول سأهزمك أنا يا ماجد، يعني التواصل الذهني مش مع الزملاء بس لأ مع الخصوم برضه.
تييري هنري كان ممكن يجري الملعب كله في 15 ثانية، اللاعب العادي ممكن ياخد وقت أكبر شوية.
في كابتن ماجد هو بيجري ماراثون مش ملعب، حلقة عشرين دقيقة بيجري من بعد خط النص ماوصلش للجون لسه، مفيش إشارات حتى توقفه، فإحداثيات الملعب في كابتن ماجد مختلفة شوية عن الطبيعي، هي نص مساحة الكرة الأرضية تقريبًا.
العرضيات في كابتن ماجد مش مجرد بتدوس دايرة وحد يحطها بدماغه في الجون، في حلقات كاملة بتبدأ بنطة من ماجد وطول الحلقة هو في الجو بيفكر وبيحاول يوصل للكورة اللي ارتفاعها أعلى من برج خليفة في الإمارات.
مش بس كده، كابتن ماجد أضاف لنا حاجات جديدة زي:-
1- الجاذبية الأرضية برة الملعب بس.
2- مش لازم تكون بطل خارق عشان تطير كفاية تكون لاعب كرة.
3- لو معندكش وقت تفكر في مشاكلك وحياتك تقدر تنط لكورة عالية وتستغل الوقت في الجو للتفكير.
4- الطيران مش كلام بس لأ انت هتهين خصمك وهتقلل منه وهتتحداه في الجو عادي.
نظرة تحليلية واستوديو مصغر لتحليل أشهر كارتون كروي على الإطلاق.. الكابتن ماجد
نرشح لكم
6 مشاهد من حياة كرويف صنعت الأسطورة
أبرز 23 موهبة متوقع تألقهم في كأس العالم
على غرار أجويرو.. إصابات خارج الملعب في كرة القدم
حراس مرمى "هدافين" يجيدون التسجيل بخصومهم
زي ليفربول الجديد في الذكرى الـ 125 لتأسيسه
كيف تغيرت الكرة المصرية منذ ظهور توتي قبل 25 عاما
14 معلومة عن كاكا في عيد ميلاده
خطوات الكشف الطبي قبل توقيع الأندية مع اللاعبين
