0
EN

بالفيديو .. نقطة الفراعنة

أهدر المنتخب المصري الأوليمبي فرصة الفوز على نيوزيلندا بالتعادل بهدف لكل فريق في المرحلة الثانية من المجموعة الثالثة في أوليمبياد لندن.

وأضاع المنتخب المصري كمية فرص مذهلة على مدار الشوطين، في حين أن المنافس تمكن من استغلال فرصته في التسجيل.

وتسبب خطأ دفاعي في تشتيت ركنية أو فشل صنع مصيدة التسلل في تلقي شباك أحمد الشناوي هدف في الدقيقة 17 عن طريق كريس وود.

وتعادل الفراعنة عن طريق محمد صلاح في الدقيقة 40 من متابعة لعرضية رائعة من محمد أبو تريكة من الجبهة اليمنى.

وبهذه النتيجة، حصد المنتخب المصري نقطته الأولى بالتساوى مع نيوزيلندا خلف بيلاروسيا والبرازيل ولكل منهما ثلاث نقاط.

ويحافظ المنتخب المصري على آماله في التأهل لدور الثمانية بشرط عدم انتصار بيلاروسيا على البرازيل وفوز الفراعنة على بيلاروسيا في مباراته الأخيرة في المجموعة.

هدف مباغت وتعويض

اعتمد هاني رمزي المدير الفني لمنتخب مصر الأوليمبي على نفس تشكيل مصر في الشوط الثاني أمام البرازيل.

وقدم المنتخب المصري أداء مميزا في الشوط الأول وكاد ينهيه متقدما لولا الخطأ الذي تلقاه مرمى الشناوي أو الفرص التي أضاعها الفريق.

وكاد تريكة يفتتح التسجيل في الدقيقة 14 عندما تلقى عرضية من عماد متعب من الجبهة اليسرى ولكنه "قلش" بغرابة.

 

وفي الدقيقة 21 أهدى تريكة طولية عميقة رائعة لمتعب ولكن الأخير تباطأ في التسديد حتى شتتها الدفاع النيوزيلندي.

وأضاع صالح جمعة فرصة التسجيل مرة أخرى في الدقيقة 34 عندما توغل من الجبهة اليسرى وسدد ولكن أنقذ الكرة مايكل أوكيفي حارس مرمى نيوزيلندا.

وبعد التعادل المصري، لم يتمكن متعب من التقدم للفراعنة في الدقيقة 41 عندما حول رأسية بعيدة عن المرمى.

متعب وفتحي؟

واصل المنتخب المصري ضغطه في الشوط الثاني ولكن دون جدوى، وتمكن أوكيفي حارس نيوزيلندا من التصدي للإعصار المصري كثيرا.

وتصدى أوكيفي في الدقيقة 50 لرأسية متعب وتسديدة لأبو تريكة في الدقيقة 48.

وحافظ رمزي على تشكيله حتى الدقيقة 68 عندما أدخل أحمد مجدي بدلا من محمد النني ليتخلى لأول مرة عن ثلاثي الارتكاز.

وبدأ مسلسل أخر 20 دقيقة في إهدار الفرص غير الطبيعية وكانت أبرزهم عن طريق أحمد فتحي وعماد متعب.

في الدقيقة 83 استلم فتحي الكرة واخترق ولكنه تباطأ في التسديد حتى شتت الدفاع النيوزيلندي الكرة.

وأقحم رمزي مروان محسن ووشهاب أحمد بدلا من تريكة وجمعة في الدقيقة 88.

وأضاع متعب فرصتين متتاليتين في نهاية المباراة تصدى الحارس لواحدة وتكفل متعب بتسديد الأخرى خارج المرمى الخال من حارسه.

تعليقات فيلجولرز (15 تعليق) اضف تعليق

brasilian_83   الأحد ، 29 يوليو 2012 - 16:58

مبروك لمصر

15

مبروك لمصر الاقتراب من الصعود
طبعا منتخب بلدى هيطيكم زقة ان شاء الله عشان تصعدوه
نفسى اقابلكم تانى فى دور ال4

محمد يوسف درويش
البرازيل
ahly_barcelona_inter   الأحد ، 29 يوليو 2012 - 16:7

منتخب الفشلة

14

انا من الناس اللى ضيعت صيامها على المنتخب الفاشل دة واللاعيبة الفاشلة دى
هانى رمزى صدقنى انتا محترم وكنت لاعب ممتاز لكن مدرب تعبان اوووووووووووووووووووووووى
مستنى اية يا راجل علشان تلعب باتنين راس حربة مستنى اية علشان تطلع متعب وتريكة اللى خصلوا بنزين من الشوط الاول
احمد الشناوى: بجد انا شخصيا اتصدمت فيك كنت فاكر انك هتبقى حارس مرمى عالمى طلعت حارس مرمى بطيخى
احمد فتحى: يا راجل اتقى الله ولا اوفر صح ولا شوطة بين العارضتين انفراد سهل اوى
ابوتريكة: شكرا على مجهودك لكن سنك ميسمحش انك تلعب ماتشين وانتا صايم فى مدة قصيرة بعد الشوط الاول انتهيت بدنيا مكنتش قادر حتى تباصى
متعب: مفيش غير كلمة واحدة بس ممكن تتقال بس مينفعش اقولها فى الصيام اتمنى يا متعب تتفرج على نفسك مش الماتش دة بس انتا كل موسم بتبقى اوحش من اللى قبلة كل موسم حظك بيبقى اسوا من اللى قبلة
الملخص المتخب الفقرى دة هيودع لندن من الدور الاول محدش يتفرج على ماتش الاربعاء علشان منخسرش صيامنا تانى
brasilian_83   الأحد ، 29 يوليو 2012 - 16:4

مش قولتلكم البرازيل استهترت وانتم فريق مش تمام

13

ياجماعة الكرة اجوان حتى البرازيل قالت لكم اهم شىء اخدناه الى اعيزينه من المبارة
التاريخ لم يذكر الفريق الذى لعب افضل لكنه سيذكر الفريق الذى فاز بلمبارة وبالتالى بلبطولة

والله صعبنين علية قولت لكم فريق تعبان مش صدقتونى عموما انتم سعداء بكده فخلاص ليس على الناس حرج

وبخصوص الاحلام مفيش مشكلة لازم تحلموه عشان تتعذبوه وتستمتعوه بلعذاب ويستحق الى يجرالها عموما البرازيل ان شاء الله هتكسب بيلاروسيا دلوقتى عشان تساعدكم فى الصعود

مش عارفين تكسبوه نيوزيلاندا وما هتكسبوه ايه؟ السمنة البلدى؟

يابنى الى يجىء على بورسعيد والنادى المصرى ميكسبش ابداء والنتيجة اهوه فى ارض الواقع

ارجوه النشر لاننا فى عصر الديمقراطية

محمد يوسف درويش
البرازيل - برازيلى من اصل مصرى وعاشق النادى المصرى
treka45   الأحد ، 29 يوليو 2012 - 15:52

حراااااااااااااااااااااااااااااااااااااااااااااااااااااااام

12

تعادل بطعم الهزيمة مش عارف المنتخب مش عارف يكسب نيوزيلاندا اومال هيكسب مين
ثانيا عماد متعب 100 علامة استفهام فرصتين مفيش اسهل من كده
living_solo   الأحد ، 29 يوليو 2012 - 15:51

تريكه

11

عيب قوي ان الموقع يكتب كلمة نقطة ويحط جنبها صورة متعب
اي مهاجم بيضيع
وليه محطتش صورة الحارس المهزوز بتاع الزمالك اللي كل ماتش لازم يتعلم عليه بجونين تلاته
عماد وتريكه وفتحي اهم تلات لاعيبه في المنتخب
ومن غيرهم المنتخب يضيع
واكيد الاعلام دلوقتي هيولع الدنيا على متعب وتريكه وفتحي عشان اهلاويه
من الاخر براحتنا
نضيع اهداف
نجيب اهداف
المنتخب يصعد
يطلع بره البطولة
جمهور الاهلي استحالة يهاجم لاعيبته
ومن الاخر برضه ميهمناش المنتخب ده
فريق الاهلي بس هو اللي بيهمنا
الاهلي فوق الجميع
hooliganahly   الأحد ، 29 يوليو 2012 - 15:38

الله يسامحك يا متعب

10

تقريبا انا من المصريين القليليين اللى لسة محافظين على صيامهم عشان كنت بتفرج جنب والدى و والدتى مش اكتر :D
ELKONT147   الأحد ، 29 يوليو 2012 - 15:27

كفابة

9

بالنسبة للتلاته الكبار

فتحي - كل جواد ليه كبوة
تريكة - ستظل اسطورة الكرة المصرية بس تروح فين وسط الشباب
متعب - هههههههههههههههههههههههههههههه
هيا معاك في لندن ؟؟؟؟؟؟؟؟

ElKoNt ElAhLaWy
ELKONT147   الأحد ، 29 يوليو 2012 - 15:23

كفاية

8

كفاية كدة على الشناوي خد مقلب جامد في نفسه
وحجازي زيه زي غيره مفيش من بعد وائل جمعة
محمد صلاح معندوش غير انه يعدل على شماله ويلعبها سكرو
مرة تصيب والف لأ
صالح جمعة اسمه على مسمى ( اجازه على طول )
حسام حسن يا ريتو كان فضل جنب شرويدة
هاني رمزي يحصل احمد شفيق ويريحنا منه
والباقي بدون تعليق ( اللهم اني صائم )
وانا حاسس ان كل ده زنب استبعاد احمد شكري

ElKoNt ElAhLaWy
MMAY2010   الأحد ، 29 يوليو 2012 - 15:22

هارد لك لمصر

7

كالعادة نموت و نزنق نفسنا في حسابات و بصراحة انا مش مصدق ان ده متعب الي كان بيجيب الفرص و هو مغمض و فتحي كان محتاج يلعب جماعي شوية مش كل حاجة يشوط و خلاص كابتن هاني اتأخرت جدا في تبديلاتك كان المفروض التبديل من نص الشوط الثاني وقت لما نيوزيلندا استحوذت على نص الملعب و كنا محتاجين لياقة شوية عموما شكرا للعيبتنا لعبوا كويس بس للأسف محدش كان بيخلص
ELKONT147   الأحد ، 29 يوليو 2012 - 15:17

الله يسامحكم

6

انا قولت هاني رمزي ده عمره ما يكون مدرب ابدا
بينزل تغييرين في الدقيقة 87 ههههههههههههه جديدة دي
ومصمم يلاعب ناس ملهاش في الكورة خالص
محمد علاء - حسام حسن - صالح جمعة ( من انتم )
وسايب برة سعد سمير - شهاب
قدام البرازيل لعب ب 2 مهاجمين على اساس انه حيقطع البرازيل
وقدام نيوزلاندا بيلعب بمهاجم واحد على اساس انه بيحافظ على التعادل
بذمتكم ده مدرب يدرب مصر في الاولمبياد
والله العظيم الكورة عمرها ما حتتغير في مصر طول ما في ............
وفي كفاءات كتييييييير مش لاقية مكانها
لك الله يا مصر

ElKoNt ElAhLaWy
Soley911   الأحد ، 29 يوليو 2012 - 15:9

حسبي الله و نعم الوكيل فيكووووو

5

و الله حرام عليكوا ضيعتوا علي الواحد صيامه
مين هاني رمزي عشان يمسك منتخب في بطولة كبيرة زي دي و جاي يغير في اخر تلت دقايق حرام عليك والله
و انا لو علقت علي متعب و فتحي هقول كلام مش تما?م فبلاش احسن
moro0o   الأحد ، 29 يوليو 2012 - 15:4

حرام

4

قدر الله وما شاء فعل لكن فتحى ومتعب واستهتار صلاح ضيعو ماتش سهل جدا حرام بجد وبيلا روسيا اقوى بكتير كده وداعا اوليمببياد
semsem14   الأحد ، 29 يوليو 2012 - 14:57

متعب

3

مهاجم كوميدي و الله اخره الدوري المصري يا جدعان يعني مروان محسن يقعد احتياطي للبني ادم ده بامارة ايه
whitespirt   الأحد ، 29 يوليو 2012 - 14:56

حاجه تشل

2

لعيبه غريبه والله العظيم

انا في حياتي ما شفت كميه الفرص السهله دي بتروح..بجد اللعيبه كانت في قمه الاستهتار

منتخب فاشل ويستحق الخروج ويستاهل الخروج من بطوله محترمه زي دي

كل الفرص راحت

كور بالراس ماشي انفراد ماشي شوط من ر=بره كل الفرص راحت كور كلها ماتروحش من عيل صغير حاجه بجد غريبه

احمد فتحي انا مش فاهم ماله ولا عماد متعب زي ما يكون حد دافعله عشان يضيعنا

يلا بالسلامه مستنينكو ع الفطار...

انشر يا فير ..وكتر الخير
semsem14   الأحد ، 29 يوليو 2012 - 14:56

متعب

1

اضف تعليق

مرحبـــا!

لكى تتمكن من تسجيل تعليقاتك لابد من تسجيل دخولك أولا
تسجيل دخول

اخر الأخبار

نرشح لكم

فيديو - الأهداف الـ7 لمهاجم الأهلي الجديد هذا الموسم فريق الدوري محمد إبراهيم 9 هفوات لمويس كأس العالم لا يحق للزمالك شكوى بتروجيت

الأكثر مشاهدة خلال اسبوع

أستطلاع أراء

هل تتوقع تأهل منتخب مصر الأوليمبي لدور الثمانية؟